Йитoдсo водзo сoвмoдны-енмoдны

Сыктывкарса вöр институтын водзö бурмöдöны-ёнмöдöны велöдан юкöн да производство костын йитöдсö.

Та йылысь сёрни мунiс республикаса Юралысь Вячеслав Гайзерлöн Санкт-Петербургса государственнöй лесотехническöй университетысь выль ректор Юрий Беленькийкöд аддзысьлöм дырйи, кöнi вöлiны тшöтш регионса йöзöс велöдöм кузя министр Владимир Шарков да Сыктывкарса вöр институтысь директор Валентина Жиделева.

Вячеслав Гайзер чолöмалiс Юрий Беленькийöс нималана университетьш ректоравны босьтчöмöн да вöзйис öтувтны Коми правительстволысь да вузлысь вынсö, медым бурджыка дасьтыны вöр овмöсын аскиа уджалысьясöс.

— Коми Республикалы, кöнi бура сöвмö вöр промышленносьт, зэв тöдчана велöдны экономикалöн тайö юкöнас колана специалистъяссö, — пасйис Вячеслав Гайзер. — Та дырйи сёрниыс мунö оз сöмын вöр овмöс, но и сыкöд йитчöм химия да биология юкöнъяс йылысь. Уджö öнiя выль технологияяс пыртöмкöд йитöдын химия-биологияысь бур тöдöмлунтöг талун вöр овмöстö сöвмöдны сьöкыд нин. И миян мог — вöзйыны предприятиеяслы сэтшöм специалистъясöс, кодъяс велöдчиганыс на пыдiсянь тöдмасьöны производствонас да диплом босьтöм бöрас удж вылас медводдза лунсяньыс петкöдчöны бур тöдöмлун-сяма профессионалъясöн.

Юрий Беленький сiдзжö пасйис, мый вузъяслы талун зэв тöдчана ёнмöдны предприятиеяскöд йитöдсö. Сылöн кывъяс серти, буретш Сыктывкарса вöр институтын торйöн нин зiльöны сöвмöдны тайö нырвизьсö.

Санкт-Петербургса лесотехническöй университетысь ректор тöдчöдiс, мый матысса кадö нин Сыктывкарса вöр институтлöн та боксянь бур опытöн тöдмасьны воласны вузысь проректоръяс.

Вячеслав Гайзер да Юрий Беленький юксисны сiдзжö федеральнöй власьт тэчаскöд удж кузя топыдджык йитöд лöсьöдöм, Сыктывкарса вöр институтын лаборатория комплекс сöвмöдöм да мукöд тöдчана юалöм кузя асланыс видзöдласöн.

Снимокыс öтуввезйын республикаса Юралысьлöн да правительстволöн лист бокысь.